મુકેશ અંબાણીએ દુબઈમાં સૌથી મોંઘો વિલા ખરીદ્યો છે. મીડિયા રિપોર્ટ્સ મુજબ, તેમણે તેના માટે 640 કરોડ રૂપિયાનો ખર્ચ કર્યો છે. અહીં તેમનો નાનો પુત્ર અનંત અંબાણી રહેશે. પામ જુમેરાહ ટાપુ પર આવેલો આ લક્ઝરી વિલા કેટલીક બાબતોમાં મુંબઈમાં તેના ઘર એન્ટિલિયાથી આગળ નીકળી ગયો છે.
મીડિયા રિપોર્ટ્સમાં આ વિલાને મુકેશ અંબાણીના નાના પુત્ર અનંત અંબાણીના નવા ઘર તરીકે જણાવવામાં આવી રહ્યું છે. દુબઈનો આ સૌથી મોંઘો વિલા સમુદ્રની વચ્ચે આવેલા એક ટાપુ પર બનાવવામાં આવ્યો છે.
દુનિયાના પહેલા આર્ટિફિશિયલ આઈલેંડ પામ ઝુમેરાહ પર બનેલા મુકેશ અંબાણીનો આ વિલા ખૂબ જ લક્ઝરી છે.
આ વિલા 33 હજાર સ્ક્વેર ફૂટમાં ફેલાયેલો છે. આ વિલાની આસપાસ ઘણી મોટી હોટલ પણ છે.
આ લક્ઝુરિયસ વિલા મોંઘા ઇટાલિયન માર્બલ અને શ્રેષ્ઠ આર્ટવર્કથી સજાવામાં આવ્યો છે. તેની ડિઝાઇનને કારણે આ વિલા જેટલો ક્લાસિક છે તેટલો જ મોડર્ન પણ છે.
આ વિલા સાથે 70 મીટર લાંબો પ્રાઈવેટ બીચ પણ જોડાયેલો છે. જેના કારણે અહીં રહેતા લોકો પોતાના ઘરમાં જ બીચની મજા માણી શકે છે.
તેમાં 10 લક્ઝરી બેડરૂમ છે. આ ઉપરાંત અહીં ઇન્ડોર જીમ અને સ્પોર્ટ્સ કોમ્પ્લેક્સ જેવી સુવિધાઓ છે. રમતગમત પરિસરમાં અડધા ડઝનથી વધુ રમતો માટે સંસાધનો અને જગ્યા છે.
આ વિલા પાસે બ્રિટિશ ફૂટબોલર ડેવિડ બેકહમ અને બોલિવૂડ મેગાસ્ટાર શાહરૂખ ખાનનું પણ ઘર છે. આ રીતે આ વિલા અમીરો માટે રહેવાની પસંદગીની જગ્યાઓમાંથી એક છે.
બ્લૂમબર્ગના રિપોર્ટ મુજબ મુકેશ અંબાણીએ આ ડીલ દુબઈની બેલેવ્યુ રિયલ એસ્ટેટ સાથે કરી છે. બેલેવ્યુ રિયલ એસ્ટેટ આ ટાપુ પર મોંઘા વિલા ખરીદવા અને વેચવાની ડીલ કરે છે. આ કંપની સાથે જોડાયેલા કોનર મેકે દુનિયાના સૌથી મોંઘા પ્રોપર્ટી બ્રોકર છે. આ ઘર મુકેશે તેમની પાસેથી ખરીદ્યું હતું.
રિપોર્ટમાં દાવો કરવામાં આવ્યો છે કે બેલેવ્યુ રિયલ એસ્ટેટ કંપનીએ એપ્રિલમાં યુટ્યુબ પર અંબાણીના નવા ઘરનો વીડિયો પોસ્ટ કર્યો હતો. જો કે, યુટ્યુબ પર એપ્રિલ મહિનામાં આ ઘરની કિંમત 609 કરોડ જણાવવામાં આવી છે. તેમાં કર અને અન્ય ખર્ચનો ઉલ્લેખ નથી.
ફર્સ્ટપોસ્ટે પોતાના રિપોર્ટમાં ડીલ સાથે જોડાયેલા લોકોના હવાલા સાથે લખ્યું છે કે અનંત અંબાણી વિલાની સુરક્ષા અને બ્યુટીફિકેશન પર વધુ પૈસા ખર્ચ કરશે. આ સંપત્તિનું સંરક્ષણ અને પુનઃવિકાસ હવે પરિમલ નથવાણી દ્વારા કરવામાં આવશે. ખરેખર, પરિમલ નથવાણી રાજ્યસભાના સભ્ય હોવાની સાથે જ રિલાયન્સ ઇન્ડસ્ટ્રીઝ લિમિટેડની કોર્પોરેટ બાબતોના ડિરેક્ટર પણ છે.
સમુદ્રની વચ્ચે એક ટાપુ પર હોવા છતાં, મુકેશ અંબાણીના નવા ઘર પર દરિયાઈ મોજા કે જોરદાર પવનની કોઈ અસર નહીં થાય. તેનું કારણ છે ટાપુની ડિઝાઇન. દરિયાના મોજાથી બચાવવા માટે પાણીમાં પત્થરો ભેળવીને 11 કિલોમીટર લાંબુ અર્ધચંદ્રાકાર આકારનું બ્રેકવોટર તૈયાર કરવામાં આવ્યું છે.
મુકેશ અંબાણીએ તેમના મોટા પુત્ર આકાશ અંબાણી માટે એપ્રિલ 2021માં યુકેમાં સ્ટોક પાર્ક લિમિટેડ ખરીદી હતી. તેની કિંમત લગભગ 79 મિલિયન ડોલર એટલે કે 631 કરોડ રૂપિયા છે. તેમાં લક્ઝરી હોટેલ, સ્પા અને ગોલ્ફ કોર્સ પણ છે.
