દુનિયાની સૌથી મોંઘી કારોમાંથી એક ટેસ્લા કારની ભારતમાં લાંબા સમયથી રાહ જોવાઈ રહી છે. ગયા વર્ષે જાન્યુઆરીમાં ભારતમાં ટેસ્લાનું રજીસ્ટ્રેશન થયા પછી, અત્યાર સુધી લોન્ચિંગને લઈને સ્થિતિઓ સ્પષ્ટ થઈ નથી. પરંતુ ભારતમાં કારના શોખીન કેટલાક લોકોએ આ લોન્ચિંગની રાહ જોઈ નથી અને આ કારને ઈમ્પોર્ટ કરીને પોતાના ઘરે ઉભી કરી દીધી. આ થોડા લોકોમાં ભારતના સૌથી અમીર વ્યક્તિ મુકેશ અંબાણીનું નામ ન હોય, એવું તો કેવી રીતે બની શકે. તો તમને જણાવી દઈએ કે મુકેશ અંબાણીની પાસે એક નહીં પરંતુ બે ટેસ્લા કાર છે.
ટેસ્લા કાર ઈમ્પોર્ટ કરવી ખૂબ મોંઘું: હાલમાં ભારતમાં માત્ર ચાર લોકો પાસે ટેસ્લા કાર છે. તેનું કારણ એ છે કે દરેક વ્યક્તિ પોતપોતાના કારણોસર દેશની બહારથી આ કાર ખરીદ્યા પછી કરોડો રૂપિયાની મોટી રકમ ઈમ્પોર્ટ ડ્યુટી ચૂકવવા ઈચ્છતા નથી. આ જ કારણ છે કે અત્યારે ભારતના રસ્તાઓ પર ટેસ્લાની કાર ભાગ્યે જ જોવા મળે છે. તમને આગળ જણાવશું કે ભારતના કયા ચાર લોકો પાસે આ કાર છે.
એસ્સાર ગ્રુપના પ્રશાંત રૂઈયા: ટેસ્લા કારના માલિકોમાં એસ્સાર ગ્રુપના પ્રશાંત રુઈયાનું નામ ખૂબ જ ખાસ છે. કારણ કે રુઈયા એવા પહેલા ભારતીય છે જેમની પાસે ટેસ્લા કાર છે. પ્રશાંત રુઈયા પાસે 2017 થી જ ટેસ્લા કાર છે. રુઇયા પાસે વાદળી રંગની ટેસ્લા મોડલ X છે. આ ઇલેક્ટ્રિક એસયુવીમાં બે મોટર છે અને તેમાં 7 સીટ છે. આ કાર માત્ર 4.8 સેકન્ડમાં 100 કિલોમીટર પ્રતિ કલાકની ઝડપ પર પહોંચી જાય છે.
મુકેશ અંબાણીની પાસે છે બે ટેસ્લા કાર: મોંઘી કારોના શોખીન મુકેશ અંબાણી પાસે એક નહીં પરંતુ બે ટેસ્લા કાર છે. મુકેશ અંબાણીએ 2019માં પોતાની પહેલી ટેસ્લા કાર ખરીદી હતી. તેમની પહેલી ટેસ્લા કારનું મોડેલ ટેસ્લા મોડલ S 100D છે. આ મોડલ એકવખત ફુલ ચાર્જ કરવા પર 495 કિમી દોડી શકે છે અને તેની ટોપ સ્પીડ 249 કિમી પ્રતિ કલાક છે. આ કાર માત્ર 4.3 સેકન્ડમાં શૂન્યથી 100 કિમી પ્રતિ કલાકની ઝડપ પકડી શકે છે.
ત્યાર પછી મુકેશ અંબાણીએ ટેસ્લા મોડલ X 100D ખરીદીને ખાનગી રીતે ઈમ્પોર્ટ કરાવી. સફેદ રંગની આ કાર અત્યાર સુધી રસ્તાઓ પર ભાગ્યે જ જોવા મળી છે. આ કાર પણ મિડ-વેરિઅન્ટની છે અને એકવાર ફુલ ચાર્જ થયા પછી તે 475 કિલોમીટરની રેન્જ આપે છે. આ કાર માત્ર 2.5 સેકન્ડમાં શૂન્યથી 100 કિમી પ્રતિ કલાકની ઝડપ પકડી શકે છે.
રિતેશ દેશમુખને ગિફ્ટમાં મળી ટેસ્લા: આ લિસ્ટમાં બાકીના બે નામ બોલિવૂડના છે. બોલિવૂડ અભિનેતા રિતેશ દેશમુખ પાસે પણ ટેસ્લા મોડલ X છે, જે તેને તેની પત્ની જેનેલિયા ડિસોઝા તરફથી ગિફ્ટ તરીકે મળી હતી.
પૂજા બત્રા પાસે પણ ટેસ્લા કાર: ભૂતપૂર્વ મિસ ઈન્ડિયા પેસિફિક અને અભિનેત્રી પૂજા બત્રાનું આ લિસ્ટમાં છેલ્લું નામ છે. તેમની પાસે એન્ટ્રી-લેવલ ની ટેસ્લા મોડલ 3 છે. બેઝ મોડલ હોવા છતાં પણ આ કાર 5 સેકન્ડમાં 100 સુધીની સ્પીડ પકડી લે છે. તેની રેન્જ 386 કિલોમીટર અને ટોપ સ્પીડ 200 કિલોમીટર પ્રતિ કલાક છે.
